Gazteentzako ikastaro teknologikoak emango ditu azaroan Eureka! Zientzia museoak
Haur eta gazteei zuzendutako ikastaro teknologikoak eskainiko ditu Eureka! Zientzia museoak azaroko larunbatetan. Txikienek joko propioak sortzen ikasiko dute; helduagoek, berriz, app bat sortuko dute zerotik.
Abentura grafikoa Minecraften izeneko ikastaro teknologikoa antolatu du Eureka! Zientzia museoak 7 eta 14 urte bitarteko haurrentzat. Minecraft-i esker, joko bat sortzera zentratuko dira gazteak. Jolasten ari diren bitartean, ikasten joango dira eurek sortutako eduki propio eta pertsonalizatuak garatuaz.
Irakasleek landutako Minecraft mundu bat emango diete parte-hartzaileei eta hauek komandoak erabiltzen ikasiko dute, hauekin munduan abentura grafiko motako joko bat sortu ahal dezaten. Baliabideak era askotarikoak izango dira: jokalariak ibilbide batean zehar eta orden zehatz batean ibiltzera behartuko dituzten komando-sortak, ateren bat ireki edo objektu garrantzitsuren bat jasotzeko ebatzi beharreko asmakizunak, tranpak, jokoaren grafikoak pertsonalizatzeko aukerak, jokoa ikusgarriago egiteko beste hainbat gako...
12-17 urte bitarteko haurrek aplikazioen mundu amaigabean murgiltzeko aukera izango dute Aplikazio mobilak! Hasi App Inventor-ekin ikastaroaren bidez. Ikastaro honen helburua zerotik hasita app bat sortzea izango da, elementu guztiak norberak gehitu eta programatuz. Lehenagoko ezaguerarik izan beharrik gabe programazioaren oinarrizko kontzeptuak ikasiko dituzte tresna indartsu honi esker. Era honetan ia unibertsal bihurtzen ari den Android plataformarako app sinple eta joko txikien programazioa guztion eskura izango da.
Bi ikastaroak azaroaren 4, 11, 18 eta 25ean emango dira Eureka! Zientzia museoan, 10:30etik 13:30era bitartean. Ikastaro bakoitzaren prezioa 110 eurokoa izango da; Eureka!ko lagunak, Gaztedi, Familia Ugaria edo anai-arreben kasuan, 100 eurokoa.
Izenak emateko edo informazio gehiago jasotzeko 943 012 478 telefonora deitu daiteke edo eureka@eurekamuseoa.es helbidera idatzi.
