Kepa Junkera eta Sorginak datorren igandean Bilbon
Udagoieneko Ostera kultur zirkuituaren eskutik datoz Bilboko BBK salara, azaroaren 19an. “Maletak” ikuskizunean bat egiten dute antzinako ohiturek, munduko doinuetan inspiratuta sortutako kantek eta publikoaren indarrak.
Euskaltzaleen Topaguneak hemezortzigarrenez antolatu du Bizkaiko udalerrietan euskarazko kultur emanaldiak zabaltzeko zirkuitua, Udagoieneko Ostera. Datorren igandean BBK salan izango den ikuskizun hau aurtengo edizioko hirugarren emanaldia izango da.
Azaroaren 19an “Maletak” ikuskizunean bat egiten dute antzinako ohiturek, munduko doinuetan inspiratuta sorturiko kantek eta publikoaren indarrak.
Ikus-entzunezko esperientzia honetan, Kepa Junkerak lagun dauka oholtzan Sorginak; dantzari, kantari eta perkusiojole diren emakume gaztez osatutako taldea. XVIII. Udagoieneko Osteraren hirugarren emanaldia azaroaren 19an izango da. 20:00etan hasiko da, Bilboko BBK salan. Sarrerak Interneten, Kutxabanken kutxazainetan eta aretoetan bertan erosi daitezke.
Datozen emanaldiak
Anarik zabaldu zuen aurtengo edizioa, joan zen asteburuan Larregi taldearen eta Hesianeko Zuriñe eta Franen akustikoa izan zen Igorren eta BBKko emanaldiaren ostetik etorriko dira beste lau, errenkadan: Su ta Garren zuzenekoa Bilboko Kafe antzokian, Ez dok Hiru antzerkia Arrigorriagan eta Miss Karaoke antzerkia Leioan.
Udagoieneko Osteran datozen asteetan izango diren emanaldien berri eduki nahi duenak hurrengo estekan dauka erantzuna: http://topagunea.eus/udagoieneko-ostera-2017/
