Miss Karaoke antzerkiak itxiko du aurtengo Udagoieneko Ostera Leioan
Bizkaiko kultur zirkuituak abenduaren 2an itxiko du 18.edizio arrakastatsu hau. Miss Karaoke antzerkiak umorea, absurdoa eta perfomance arima ekarriko ditu Kultur Leioara.
Joan zen ostegunean pil-pilean jarri zuen Bilboko Kafe Antzokia Su ta Garren zuzenekoaz, eta Arrigorriagan lepo bete zuen Ez dok Hiru antzerkiak Lonbo aretoa.
Aurtengo kultur zirkuituak ere arrakasta itzela izan du euskaltzaleen artean; hemen eta euskaraz egiten den kulturaren zaleak asko direla egiaztatu dugu urte bat gehiagoz, eta publikoak gogotsu erantzuten diola Udagoieneko Osterari.
Hemezortzigarrena izan da aurtengoa, urrian hasi zen Anariren Berrizko emanaldiaz eta, konturatu orduko, heldu gara azken geltokira. Leioara. Kultur Leioara. Datorren zapatuan Miss Karaoke antzerkia izango da han, Udagoieneko Osteraren eskutik.
Abenduaren 2an Leioan
Datorren larunbatean da hitzordua, Kultur Leioan, 20:30etan. Larunbatean goxo gozatzeko moduko antzerkia duzu Miss Karaoke,Metrokoadroka kolektiboak eta Pez Limbo konpainiak elkarrekin sortutako lana:
Miss Karaoke-k abesti bat kantatzeko enkargua jaso du, eta urduritzen hasia da. Zer kantatuko du Ebento Handian, Antolatzaile Handiaren enkarguz, Jende Guztiaren aurrean? Are gehiago, zein hizkuntza aukeratuko du? Gutxiengo gutxitu, gehiengo gutxitu, gutxiengo gehiengotu edo gehiengo gehiengotuagotuentzat kantatuko du?
“Zerk definitzen zaitu?”, “Identitatea aukeratu egiten da, edo identitateak aukeratzen zaitu zu?”. Era horretako galderei erantzuna bilatuko die Miss Karaokek, bere barne ahotsekin talkan. Umorea, absurdoa eta perfomance arima uztartzen dira eszena-lan honen taularatzean.
“Miss Karaoke” antzezlanaren oinarrian dagoen testua Oier Guillanek idatzi zuen DSS2016-ek bultzatutako “Dramaturgia berriak” deialdiaren baitan, eta Gasteizko Principal Antzokiak ekoiztu du, Arriaga eta Victoria Eugenia antzokiekin elkarlanean.
Sarrerak Interneten, Kutxabanken kutxazainetan eta Kultur Leioan bertan erosi daitezke.
