Polaris filma 3D formatuan ikusteko aukera asteburuan Planetariumean
Donostiako Eureka! Zientzia Museoko Planetariumean gai eta ezagutza ezberdinetako hainbat pelikula proiektatzen dira. Asteburu honetan, esaterako, Polaris filma ikusteko aukera izango da 3D formatuan.
Proiektore berriak jarri dituzte Eureka! Zientzia Museoko Planetariumean, hori dela eta, pelikulak 3D formatuan ikusteko aukera eskaintzen dute. Asteburu honetan, familiei eta haurrei zuzendutako Polaris filma emango dute larunbatean eta igandean; 17:00etan euskaraz, eta 13:15ean gazteleraz.
Hau da filmaren sipnosia: James, Hego poloko pinguino bidaiari bat, eta Vladimir, Ipar poloko hartz dibertigarri bat, bankisa artikoan aurkitzen dira. Astronomia zaletu hauek Lurreko poloetan gaua hain luzea izatearen arrazoia zein den galdetzen diote euren buruari. Abentura zientifiko harrigarria biziko dute espazio-ontzi batean behatoki bat eraiki ondoren. Lurraren inguruan eta Martetik Sarturnora egingo duten bidaian euren galderari erantzuna aurkituko diote, eta planetek elkarren artean antzekotasunak zein ezberdintasunak dituztela ere ikasiko dute.
Pelikulak 30 minutu inguruko iraupena izango du, eta publiko guztiarentzat dago zuzendua.
