Zergatik da garrantzitsua ginekologoarengana joatea?
>Albiste berezia
Bai, argi esan dezagun, inork ez du gustuko medikuarengana joatea. Atzeratu eta atzeratu egiten dugun gauza horietako bat da, eta, sarritan, beste aukerarik ez dagoenean joaten gara; zer esanik ez, ginekologoarengana joan behar bada. Horregatik, garrantzitsua da kontzientziatzea, eta jakitea ginekologoarengana joatea hil edo bizikoa izan daitekeela kasu askotan.
Uste dugu ginekologoarengana joan behar dela haurdunaldi garaian edo bizitza sexual aktiboa izanez gero. Baina gomendagarria da, gutxienez, urtean behin joatea azterketa orokorra egitera. Ez da itxaron behar sintomak agertu arte; izan ere, ginekologoak tratatu beharreko gaixotasun asko asintomatikoak dira.
Hobe da prebenitzea, tratatzea baino
Ginekologoa da aditua emakumezkoen osasunean eta gorputzean. Bizitzan zehar izan behar dituen zaintzak ezagutzen ditu, eta bere espezialitatetik harago dauden gaixotasunak antzeman ditzake.
Horregatik, behar-beharrezkoa da ginekologoarengana joatea horiek prebenitzeko eta, jadanik gaixotasuna agertu bada, denboraz trata ditzan lortzeko. Diagnostiko goiztiarra
oinarri-oinarrizkoa da gaixotasun asko sendatzeko.
Zertan datzan ohiko ginekologia-azterketa bat
Normalean, azterketa ginekologiko osatu batek ondorengo hauek izaten ditu: historia kliniko zehaztua, ekografia baginala eta zitologia. Azken hori minik gabeko proba bat da, eta giza papilomak eragin ditzakeen lesioak baztertzea du helburu; izan ere, ez badira tratatzen, minbizia eragin dezakete. Proba hori urtero egiten da, frotis baginal baten bidez, baina joera, emakumezkoaren ezaugarrien arabera, hiru urtean behin egitea da, lagina erdi-likidoan mantenduta; horri, zitologia likido deritzo. Ginekologoak berak gomendatuko du ze zitologia mota egin kasu bakoitzaren arabera.
Batzuetan, mamografia batekin edota bularreko ekografia batekin osatuko da azterketa. Kasu horretan ere, espezialistak erabakiko du proba hori egin edo ez.
Nahiz eta esaten den egunero sagar bat jateak medikua etxetik aldentzen duela, Zuatzu klinikaren gomendioa da urtean behin ginekologoarengana joatea, bizitza osasungarriagora hurbiltzen zaituelako, ezustekorik gabea.
Zuatzu Klinika
