Jasone Agirre: "Alderdiek lekua izaten jarraituko dute, baina besteok ere izango dugu gurea"
EH Bilduk subjektu politiko bilakatzeko prozesuan dago, eta ekainaren 17an kongresu erabakigarria izango dute. Jasone Agirre legebiltzarkide bizkaitarrak, prozesuaren gaineko xehetasunak, eta kongresuaren osteko pausoak zeintzuk izango diren azaldu dizkigu.
2011n Bildu jaio zenetik, gaur egunera... Hitzordu garrantzitsua du EH Bilduk ekainaren 17an.
Garrantzitsua da, bai. Batzuetan gure prozesua hor bukatzen dela dirudi, baina prozesua, berez, hor hasiko da. Gura dugun aldaketa ez da egun batetik bestera, edo hilabetean egitean. Epe luzerako prozesu bat da. EH Bilduk 6 urte ditu, ez asko mugimendu edo koalizio batentzako, baina indar handiz hasi zen, eta askok gure konfiantza eman genion. Emaitza ona egon zen hauteskundeetan, eta orain aldaketa behar duen unea heldu da. Aldatu edo neurria hartu, beti mugimenduan dagoen formazio bat delako, eta jendearen neurrira egokitzen joan behar du. Sortu zenean, koalizio baten moduan sortu zen, lau alderdiren koalizio moduan, eta orain ikusten da nire kasuaren moduan, edo Maddalen Iriarteren kasuaren moduan, ez gatozela alderdi batetik. Beraz, gero eta jende gehiago gaude EH Bildurekin bakarrik identifikatuta sentitzen garenak, eta alderdietatik datozen batzuk EH Bildu sentitzen dira jada. Beraz, egoera berri bat, eta egoera berri honen aurrean egitura moldatu beharra dago. Koalizio baten forma edukiko du, alderdi baten egitura, eta bokazio edo helburutzat mugimendu zabal baten bihurtzea izango da. Ezkerreko sentitzen denak eta subiranista sentitzen denak EH Bildu barruan lekua izan dezala da helburua.
Ze onura ikusten dizkiozu EH Bildu subjektu politiko bilakatzeari?
Esate baterako, alderdi batetik ez gatozenok gure lekua izango dugu. Alderdiek haien lekua izaten jarraituko dute, zalantzarik gabe, baina besteok ere izango dugu gurea. Orain arte, sarbidea alderdiak bakarrik ziren, eta informazioa jasotzeko ere ez zegoen biderik. Eraginkorragoa izango da ere. Jendearen neurrira egindako mugimendu bat izatea nahi badugu erantzunak ere arinak eta jende horren neurrira egindakoak izan behar dute. Baina edozein erabaki hartu behar bada lehenengo alderdi bakoitzak eztabaidatu behar badu, bakoitzak bere postura hartu eta gero dena mahai orokor batera eraman, horrek asko astuntzen du. Horrek dira abantaila handi batzuk. Baina baditu beste batzuk ere. mugimendu zabal bat izatean, errazago gerturatu daiteke sigla konkretu batzuetara lotu nahi ez duen jendea. EH Bilduren bokazioa beti izan da gutxieneko bat egiten dugun hori lehenestea. Beraz, jendea gerturatzeko errazagoa izango dela uste dut.
Parte-hartzea EH Bilduren zutabeetako bat izan da hasieratik. Garrantzia eman nahi izan diozue prozesuari ezta?
Herriz herri ibili gara foroetan, jendea animatzeko eta azaltzen nola den prozesua, nola parte hartu daitekeen... Berritasuna modu telematikoan egingo dela izango da, nahiz eta EH Bilguneetan eskuz ere egin daitezkeen. Kongresuan eta prozesu honetan parte hartzeko baldintza bakarra kongresua.ehbildu.eus helbidean izena ematea da, inongo konpromiso barik. Hau da, ez zara afiliatuko horregatik. Horrekin norberak bere burua aurkezteko aukera izango du, dauden ardura ezberdinetarako, gero aurkeztu ahal izateko abalak aurkeztu edo eman behar dituzu, eta bozketarako aukera ere egongo da. Ekainaren 4ra arte eman daiteke izena. Kongresutik aurrera, afiliatu izateko aukera ere egongo da, baina hori, ekainetik aurrera izango da.
Ze punturaino eragin dute azken hauteskundeetako emaitzek prozesuari bultzada emateko?
Azkenengo hauteskundeetan jendea piztuta ikusi nuen nik, ilusioarekin. Hainbat arrazoigatik izango zen, agian. Arnaldo Otegi kalean zegoen, beste hautagai batzuk zeudelako, berritasunak zeuden... eta jendea ilusioarekin ikusi genuen. Horrek indarra ematen dizu ere. Ez zara prozesu baten sartzen ez badakizu jendea bat egingo duen ala ez. Nire ustez, azkeneko hauteskundeetan emaitzak nahiko onak izan ziren kuantitatiboki, baina alde kualitatiboan lortu zen jendea animatzea. Beraz, baldintza batzuk eman izan dira, eta gero ni edo Maddalen Iriarte gerturatu ginen proiektura. Gogoeta lehenagotik eginda zegoen, eraginkortasunean eta barneko funtzionamenduan gabeziak zeudela ikusten zelako, baina jendeak ondo erantzun zuen, eta eskertzekoa da.
Ahots kritiko batzuk ere azaleratu dira batze prozesuarekiko. Kezkatzeko arrazoirik badute?
Ez da kezkatzeko kontu bat, kritikoek eta Pello Urizarren aldekoek inoiz ez dutelako zalantzan jarri EH Bildu proiektu moduan. Baina gogoeta batzuk ekartzen dizkit niri. Lehen pertsonan bizi izan dut eztabaida hau. ni 'independiente' moduan sartu nintzen irailean eta ateak eta eskuak zabalik izan ditut. Banekien koalizio bat zela, baina koalizio horretan buruak identifikatzen nituen. Baina azkenean pertsona da balio duena, eta ez da hain garrantzitsua nondik datorren bakoitza baizik eta helburu bat partekatzen dugula. Ez dut uste EH Bilduk klub pribatu bat izan behar duenik edota bazkide baten eskutik bakarrik sartu behar zarenik. Denontzako lekua egon behar da, bestela guk ez genuke botorik emateko ezta ezer esateko eskubiderik. Informazioa jasotzeko modurik ere ez, alderdien bidetik jasoko litzatekeelako. Jende askori aukera ematea galduko genuke, eta gizartea aldatu nahi badugu mugimendu zabal bat izan behar dugu. Lau alderdirekin ondo dago hasteko, baina hori baino indar handiagoa behar da. Horretarako eskuzabalak izan behar dugu, gurekin izan diren bezala. Ez dut uste horrek kalterik ekarriko duenik, baizik eta kontrara.
Epe laburrera subjektu politiko bilakatu nahi du EH Bilduk; epe ertain-luzera zein izango litzateke helburu nagusia?
Mugimendu zabal bat bihurtzea izango litzateke hurrengo pausoa. Horretarako subjektu bezala, eta militante bat bozka bat, baina gero asmoa, itxaropena edo helburua ahalik eta jende gehien gerturatzea izango litzateke. Batzen gaituen horretatik hasi, eta horri indarra emanda gure ingurua aldatzea. Euskal Herri justu eta libre bat lortzea ez da erakundeetatik bakarrik egin daitekeen kontua. Erakundeak garrantzitsuak dira, baina hori baino zabalagoa izan behar du. Horregatik EH Bilduk kalean eta toki guztietan egon behar du. Jendeak proiektuarekin bat egitea lortu behar dugu. Alderdi batzuekin ez, baina EH Bildurekin identifikatuta sentitzen den jendea badago. Beraz, mugimendu zabala, bizia eta erantzunak emango dituena bilakatzea da helburua.
