‘Sarean’, ingurune digitalaren irratsaioaren estreinua igandean Euskadi Irratian
Datorren igandean, arratsaldeko 15:00etatik aurrera, Leire Palaciosek gidatutako, ingurune digitalari buruzko "Sarean" irratsaio berria estreinatuko da Euskadi Irratian. "Sarean" irratsaioa, PuntuEUS Fundazioaren ekimena izanik, Euskadi Irratiarekin elkarlanean eta Euskaltelen laguntzarekin sortu da.
Igandero, arratsaldeko 15:00etatik 16:00etara, eguneroko gai arruntetaz hitz egiteaz gain, teknologiak eta Internetek musikan, literaturan, kirolean, feminismoan... nola eragiten duen aztertuko da gonbidatu baten eskutik. Baina hau ez da hemen bukatzen, komentatutako guztiaz gain, sarean.eus-eko kolaboratzaileak binaka arituko dira webgunean argitaratutako artikulu ezberdinen inguruan hitz egiten eta astero-astero webgune interesgarri bat proposatzeaz aparte, entzuleen zalantza teknikoak argitzeko prest egongo da Euskalteleko Rafa Bañales.
Uztailak 9ko estreinurako, lehen gonbidatu bezala Harkaitz Cano egongo da, literatura ez sortzaileaz eta literatura egiteko teknologiaz hitz egiteko irrikitan.
Irratsaioak, abiapuntu moduan sarean.eus webgune berritua du.
Sarean.eus ingurune digitalaren topagune bezala definitzen da eta informatzea, entretenitzea, kultura teknologikoa euskaraz sustatzea eta bertako erreferenteak sortzea da bere xedea. Webgunean lantzen diren ingurune digitalari buruzko euskarazko edukiak, kolaboratzaile aditu eta esanguratsuen eskutik berariaz landutakoak dira. Urtebetean, proiektuak indar handia hartu duenez, webgune berritua eta "Sarean" irratsaioa aurkeztu nahi izan dira eta webgune berriztuarekin batera, irratian sortutako edukiak sarean.eus-en entzuteko prest egongo dira.
