Baionak UEUren 6 ikastaro jasoko ditu uztailaren 4tik aurrera
Sei ikastaroetatik bost hizkuntzarekin lotutakoak izango dira. Saioak hasi baino astebete lehenagora arte eman ahalko da izena, Udako Euskal Unibertsitatearen webgunean.
Topaketa garrantzitsu baten elkargune izango da Baiona: Hizkuntzalari euskaldunena. Arloan lanean dabiltzan ikerlariak batuta, bakoitza zertan ari den ezagutzea eta egoera orokorra aztertzea izango dira helburuak.
Beste ikastaroetan, eta atal praktikoari begira, euskara gaitasuna lantzeko tailerra eta testu pragmatikoen itzulpena jorratuko dituzte. Gainera, Frantses iraultzaren garaiko hizkuntza politikak Euskal Herrian edukitako eraginaz mintzatuko dira, eta hizkuntza praktika ekologikoek haurren hezkuntzan dutenaz ere bai. Seigarren ikastaroa hezkuntza herritarrean sustraitzen den talde-dinamizazioaren ingurukoa izango da.
Baionaz aparte, Iruñean eta Eibarren garatuko dira udako ikastaro gehienak, Elkar Ekin lemapean. Guztira, 36 daude aukeran.
